Zhvilluam një takim zyrtar në Paris, në kuadër të një programi intensiv shkëmbimi teknik me institucionet më prestigjioze franceze në fushën e noterisë dhe regjistrimit të pronës.
Takimi në Këshillin e Lartë të Noterisë Franceze, me pjesëmarrjen e Ambasadës së Shqipërisë në Francë, përfaqësuesve të Ministrisë Franceze të Evropës dhe Punëve të Jashtme dhe DGFIP, solli diskutime mbi praktikat më të mira të sigurisë juridike dhe digjitalizimit e proceseve kadastrale.
Diskutuam gjithashtu mbi çështjet teknike të sistemit Télé@cte si dhe pamë nga afër në mënyrë praktike transmetimin elektronik të akteve dhe të dhënave drejt shërbimeve të kadastrës franceze – një proces modern i standardizuar dhe plotësisht i digjitalizuar.
Ky shkëmbim eksperiencash konfirmon vlerën e lartë të bashkëpunimit me institucionet homologe franceze dhe përforcon angazhimin e ASHK-së për të avancuar më tej digjitalizimin, ndërveprimin me noterët dhe sigurinë e transaksioneve të pronës në Shqipëri.
