Është firmosur sot marrëveshja e bashkëpunimit ndërmjet GIZ, Agjencia Shtetërore e Kadastrës dhe Ministria e Turizmit, Kulturës dhe Sportit, në kuadër të programit për rijetëzimin e kullave tradicionale në veri të Shqipërisë.
Kjo marrëveshje synon të forcojë bashkëpunimin institucional për ruajtjen, formalizimin dhe zhvillimin e qëndrueshëm të kullave, të cilat përfaqësojnë një nga elementët më të rëndësishëm të trashëgimisë historike dhe kulturore të vendit, veçanërisht në zonat veriore të Shqipërisë.
Nëpërmjet këtij bashkëpunimi, institucionet partnere do të angazhohen në ndërmarrjen e hapave konkretë për evidentimin, formalizimin dhe rijetëzimin e këtyre objekteve me vlera të veçanta arkitekturore dhe historike. Kullat, të ndërtuara kryesisht në zonat malore të veriut, përfaqësojnë një pjesë të rëndësishme të identitetit kulturor shqiptar dhe një potencial të madh për zhvillimin e turizmit kulturor dhe ekonomik të komuniteteve lokale.
Formalizimi i kullave konsiderohet një hap i rëndësishëm jo vetëm për ruajtjen e trashëgimisë kulturore, por edhe për zhvillimin ekonomik të zonave veriore, duke nxitur turizmin, agroturizmin dhe krijimin e mundësive të reja të punësimit për komunitetet lokale.
Programi për rijetëzimin e kullave të veriut synon të kthejë këto objekte historike në qendra të zhvillimit lokal, përmes restaurimit të tyre dhe përdorimit për aktivitete turistike, kulturore dhe sociale, duke ruajtur njëkohësisht autenticitetin dhe vlerat tradicionale.
